Ngabodor Sunda

Si Kabayan Ngala Lauk

Geus sababaraha peuting Si Kabayan ngadenge beja, yen tatangga-tatangga lalintarna aruntung bae. Manehna pohara kabitaeunana, tapi teu boga pakakasna.

Sanggeus mikir sakeudeung, manehna manggih akal tuluy nyarita ka pamajikanana,”Teung, engke peuting akang rek ngala lauk ka walungan, kabita ku batur nu aruntung bae.”

“Majar rek ngala lauk? Na rek naon ngalana? Teu boga heurap, teu boga useup!” tembal pamajikanna haseum.

“Tong rea omong, maneh mah nyaho engke dahar jeung  beuleum lauk we. Kadieukeun wedang pamere mitoha teh!”

“Cokot bae ku sorangan, tuh deukeut pago!” tembal pamajikanana merengut keneh.

Reup peuting Si Kabayan indit ka jalan tempat liliwatan tatangga-tatangga anu...

tas ngarala lauk Manehna eureun handapeun tangkal caringin gede. Tuluy ditaranjang, awakna dibalur ku wedang. Sanggeus rata tuluy manehna gugulingan dina kapuk bawana ti imah. Geus kitu tuluy nyumput.

Teu lila ti harita, brul jalma-jalma anu tas ngarala lauk teh ngaleut ka belah dinya. Waktu abrulan liwat lebah handapeun tangkal caringin jleng Si kabayan luncat ka tengah jalan bari igel-igelan. Puguh tingjarerit, cuk kana babawaan,”Jurig! Jurig! Jurig! Aya Jurig!”

Kalawan rineh jeung sarangah-serengeh, Si Kabayan mulungan lauk nu ngabayak sapanjang jalan, nepika pinuh sasarung. Geus kitu tuluy buru-buru balik, sieuneun aya nu nganyahokeun, sieneun kanyahoan nipuna.

Peuting eta Si Kabayan untung.